A VUCCA

A VUCCA
Alphonse Doria
(Da: DI PRIMA MATINA – Siculiana 27 marzu 2011)
 
Chiusa comu na cassaforti
è dda vucca di cu c’ascuta
discursa giusti e cosi torti,
senza sintinziari, sta muta!
Comu na casa senza porti
quannu oramà a lingua sciota
parla d’ogni cosa e di  tutti
ferma n’ogni angulu di strata!
Su amari e vilinusi i so frutti
nescinu uragana e tirrimota,
pugnalati a li spaddi afflitti,
e a ‘nfamitàti è a so spata!
A vucca c’adumanna diritti
di ddu vili potenti è astutata,
d’i cappiddazza e d’i  birritti
di tutti quanti è arricurdata.
 ‘Mpregna di sempri tutta l’arti
a vucca duci d’annamurata
unni su nudi Veniri e Marti
pi farisi na bella sunata.